കേരളത്തിന്റെ നന്മകളെ കവര്‍ന്നെടുക്കാന്‍ അനുവദിക്കില്ല: എം സ്വരാജ്

കേരളത്തെ ജാതിക്കോമരങ്ങള്‍ക്കു പണയപ്പെടുത്താനുള്ള ബോധപൂര്‍വമായ ഭരണകൂടപരിശ്രമത്തെ ചെറുത്തുതോല്‍പ്പിക്കുമെന്നും കേരളത്തിന്റെ നന്മകള്‍ കവര്‍ന്നെടുക്കാന്‍ ജാതിഭ്രാന്തന്മാരെ അനുവദിക്കില്ലെന്നും ഡിവൈഎഫ്ഐ സംസ്ഥാന പ്രസിഡന്റ് എം സ്വരാജ് പറഞ്ഞു. യൂത്തുമാര്‍ച്ചിന് കൊട്ടിയം ഏരിയയിലെ ഉമയനല്ലൂരില്‍ സി കേശവന്‍നഗറില്‍ സംഘടിപ്പിച്ച സമ്മേളനത്തില്‍ സംസാരിക്കുകയായിരുന്നു സ്വരാജ്. നവോത്ഥാനായകര്‍ കേരളത്തിനു പകര്‍ന്നുനല്‍കിയ സാംസ്കാരികബോധവും പൈതൃകവും പിച്ചിച്ചീന്തുന്ന സാമുദായിക സംഘടനകള്‍ ജനങ്ങള്‍ തെരഞ്ഞെടുത്ത ഒരു സര്‍ക്കാരിനെ നോക്കുകുത്തിയാക്കി സമുദായഭ്രാന്ത് പടര്‍ത്തുകയാണ്. അധികാരത്തിലേറാന്‍ എന്തു വിട്ടുവീഴ്ചയ്ക്കും യുഡിഎഫ് തയ്യാറാകുന്നതിന്റെ ഒടുവിലത്തെ ദൃശ്യമാണ് സമകാലിക കേരളം നേരിടുന്നത്- സ്വരാജ് ചൂണ്ടിക്കാട്ടി.