നാടുണര്ത്തി യൂത്ത്മാര്ച്ച് മുന്നോട്ട്
ജാതിരഹിതസമൂഹം, മതനിരപേക്ഷ കേരളം എന്ന മുദ്രാവാക്യമുയര്ത്തി ഡിവൈഎഫ്ഐ സംഘടിപ്പിക്കുന്ന യൂത്ത്മാര്ച്ച് ജനപദങ്ങളെ ഇളക്കിമറിച്ച് മുന്നോട്ട്. സംസ്ഥാന സെക്രട്ടറി ടി വി രാജേഷും സംസ്ഥാന പ്രസിഡന്റ് എം സ്വരാജും നയിക്കുന്ന മാര്ച്ചിന് കോഴിക്കോട് ജില്ലയില് രണ്ടാംനാള് ലഭിച്ച സ്വീകരണവും ജനമുന്നേറ്റം വിളംബരം ചെയ്യുന്നതായി. സാമ്രാജ്യത്വ അധിനിവേശത്തിനെതിരെ പോരാടി വീരമൃത്യുവരിച്ച കോട്ടക്കല് കുഞ്ഞാലി മരക്കാര്, ദേശീയ സ്വാതന്ത്ര്യസമരത്തിനും നവോത്ഥാനത്തിനുമായി പോരാടിയ കെ കേളപ്പന്, സി കെ ഗോവിന്ദന്നായര്, സാഹിത്യകാരന് തിക്കോടിയന്, പുരോഗമന സാഹിത്യപ്രസ്ഥാനത്തിന്റെ അമരക്കാരനായ എം കുട്ടികൃഷ്ണന് എന്നിവരുടെ പ്രവര്ത്തനമണ്ഡലങ്ങളിലൂടെയായിരുന്നു രണ്ടാം ദിവസത്തെ പര്യടനം. ശനിയാഴ്ച രാവിലെ വടകരയില്നിന്നാണ് മാര്ച്ച് പ്രയാണം ആരംഭിച്ചത്. ആദ്യസ്വീകരണ കേന്ദ്രം മൂരാടായിരുന്നു. പയ്യോളി, തിക്കോടി, മൂടാടി, എന്നിവിടങ്ങളിലെ സ്വീകരണത്തിനുശേഷം കൊയിലാണ്ടിയില് സമാപിച്ചു. വിവിധ സ്വീകരണകേന്ദ്രങ്ങളില് ജാഥാലീഡര്മാരായ ടി വി രാജേഷ്, എം സ്വരാജ്, മാനേജര് കെ എസ് സുനില്കുമാര്, ടി വി അനിത, പി പി ദിവ്യ, കെ ജയദേവന് തുടങ്ങിയവര് സംസാരിച്ചു. ഞായറാഴ്ചയും തിങ്കളാഴ്ചയും ജില്ലയില് പര്യടനം നടത്തുന്ന മാര്ച്ച് തിങ്കളാഴ്ച വൈകിട്ട് മലപ്പുറം ജില്ലയില് പ്രവേശിക്കും.
0 comments: